Swat Voice
سوات نیوزضرور پڑھیں

سوات وین حملہ دہشت گردی نہیں، غیرت کے نام پر قتل تھا: آئی جی

IG Police - سوات وین حملہ دہشت گردی نہیں، غیرت کے نام پر قتل تھا: آئی جی

سوات وائس :آئی جی خیبرپختونخوا پولیس معظم جاہ انصاری کے مطابق ملزمان قتل کے بعد مقتول ڈرائیور کے جنازے میں بھی شریک ہوئے اور انہوں نے مظاہروں میں بھی شرکت کی تاکہ یہ تاثر دے سکیں کہ وہ بھی سوگواران میں شامل ہیں۔

خیبر پختونخوا کے ضلع سوات کی تحصیل چار باغ میں ایک سکول وین پر حملے اور ڈرائیور کی ہلاکت کے معاملے پر صوبے کے پولیس سربراہ کا کہنا ہے کہ سوزوکی وین پر حملہ دہشت گردی نہیں بلکہ ’غیرت کے نام پر قتل‘ کا واقعہ تھا۔

جمعرات کو سوات میں پریس کانفرنس کرتے ہوئے خیبر پختونخوا کے انسپکٹر جنرل آف پولیس معظم جاہ انصاری نے بتایا کہ ’ابتدا میں پولیس کے پاس ثبوت نہیں تھے کہ یہ دہشت گردی کا واقعہ نہیں ہے اور اسی وجہ سے ڈرائیور کے لواحقین کے لیے شہدا پیکج کا اعلان بھی کیا گیا تھا۔‘

تاہم معظم جاہ کے مطابق ’اس واقعے کا مقدمہ دہشت گردی کی عدالت میں چلے گا کیونکہ اس واقعے سے عوام میں عدم تحفظ کی فضا پیدا ہوگئی تھی اور ہزاروں کی تعداد میں لوگ اس واقعے کے خلاف اٹھ کھڑے ہوئے تھے۔‘

معظم جاہ نے بتایا: ’سوات کے حالات آئندہ دو تین مہینوں میں مزید بہتر ہوجائیں گے اور تمام سیاحوں کو ہماری طرف سے یہی پیغام ہے کہ سوات میں امن ہے اور وہ بلا کسی خوف کے سوات کا رخ کر سکتے ہیں۔‘

پولیس نے واقعے کے بعد بھی بتایا تھا کہ حملے میں ٹارگٹ سکول کے بچے نہیں بلکہ وین ڈرایئور تھا لیکن عوام کی جانب سے اس پر شدید ردعمل سامنے آیا تھا اور واقعے کی شفاف تحقیقات کا مطالبہ کیا گیا تھا۔

آئی جی خیبرپختونخوا نے پریس کانفرنس کے دوران بتایا کہ واقعے میں ملوث ملزمان اور مقتول رشتہ دار ہیں اور ان کا آپس میں سالے بہنوئی کا تعلق ہے۔

انہوں نے بتایا کہ ملزمان قتل کے بعد مقتول ڈرائیور کے جنازے میں بھی شریک ہوئے اور انہوں نے مظاہروں میں بھی شرکت کی تاکہ یہ تاثر دے سکیں کہ وہ بھی سوگواران میں شامل ہیں۔

معظم جاہ نے بتایا: ’واقعے میں ملوث ایک ملزم کو گرفتار کیا گیا ہے جبکہ ایک ملزم واردات کے بعد دبئی فرار ہوگیا لیکن اسے سفارتی ذرائع سے گرفتار کرکے سوات لائیں گے جبکہ تیسرے ملزم کی گرفتاری کے لیے کوششیں جاری ہیں۔‘

ضلع سوات کی تحصیل چار باغ میں سکول وین پر حملے کا واقعہ 11 اکتوبر کو پیش آیا تھا جب ایک وین میں دو نجی سکولوں کے بچے سکول جارہے تھے۔ اس حملے میں سکول وین کے ڈرایئور ہلاک جبکہ ایک بچہ زخمی ہوا تھا۔

پولیس کا کہنا تھا کہ ’نامعلوم شخص کا ٹارگٹ سوزوکی ڈرائیور تھا۔ سوشل میڈیا پر وقوعہ کو سکول کے بچوں کو ٹارگٹ کرنے کا رنگ دیا جا رہا ہے جو غلط ہے۔‘

اس حملے کے خلاف بعد میں سوات میں مقتول ڈرائیور کی لاش کو تقریباً دو دن سڑک پر رکھ کر دھرنا دیا گیا تھا اور علاقے کے لوگوں کا مطالبہ تھا کہ حملے میں ملوث افراد کو گرفتار کیا جائے۔

اس حملے کو بین الاقوامی سطح پر بھی کوریج ملی تھی جبکہ ملالہ یوسفزئی نے پاکستان میں اپنے حالیہ دورے کے دوران بھی اس پر افسوس کا اظہار کیا تھا۔

سکول وین پر حملے کو ملالہ یوسفزئی پر حملے کی طرح دیکھا جا رہا تھا، جس کے بعد عوام میں کافی خوف پھیل گیا تھا۔ تاہم کالعدم تحریک طالبان پاکستان نے سکول وین کے حالیہ حملے میں ملوث ہونے کی تردید کی تھی۔

متعلقہ

صوبائی حکومت صحت کے شعبے میں تاریخی اقدامات اٹھارہی ہے ، وزیر اعلیٰ

Saeed

غالیگے پولیس کا سرچ اینڈ سٹرائیک آپریشن

Saeed

سوات قومی جرگہ نے فوجی آپریشن مسترد کرتے ہوئے محکمہ پولیس کو با اختیار بنانے کا مطالبہ کردیا

Saeed

Leave a Comment

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy